თამარ უჯუხუ — „კავკასიური სახლის სახალხო უნივერსიტეტის“ კოორდინატორი, თბილისის სახელმწიფო უნივერსიტეტის კავკასიოლოგიის ინსტიტუტის თანამშრომელი. იყო მხატვრული თარგმანისა და ლიტერატურული ურთიერთობების მთავარი სარედაქციო კოლეგიის ჩრდილოეთ კავკასიის ლიტერატურის სექტორის გამგე, 1989-1991 წწ. კავკასიური ეკოლოგიური მოძრაობის წევრი. 1993 წლიდან საქართველოს კულტურულ ურთიერთობათა ცენტრ „კავკასიური სახლის“ კავკასიური განყოფილების გამგე. 1999 წლიდან თსუ-ის კავკასიოლოგიური ინსტიტუტის მოწვეული მასწავლებელი, ადიღეური ენის პედაგოგი. 2003-2020 წწ. „კავკასიურ სახლთან“ არსებულ შაბათ-კვირის სკოლაში უძღვებოდა კურსს „საუბრები კავკასიაზე“. ადიღეური (ჩერქეზული ენის) სახელმძღვანელოს (2012 წ.) ავტორი (წიგნი 2021 წელს რუსულ ენაზეც გამოიცა); 1996-2010 წწ. „კავკასიურ სახლში“ გამოცემული სერიის „კავკასიის ხალხთა ფოლკლორის“ სარედაქციო საბჭოს ხელმძღვანელი და საგამომცემლო ჯგუფის კოორდინატორი. თამარ უჯუხუ „კავკასიურ სახლში“ წლების განმავლობაში სხვადასხვა პროექტს უწევდა კოორდინირებას. თანაავტორია დოკუმენტური ფილმებისა: „პანკისელი ქალები“, „იბეის დარიკო“, „ომის ბავშვები“, „ლოცვა მშვიდობისათვის კავკასიაში“, „ჩვენ დაღესტნელები“. მრავალი წლის განმავლობაში აქვს ურთიერთობები არასამთავრობო ორგანიზაციებთან მთელ კავკასიაში. არის არაერთი სემინარის, „მრგვალი მაგიდისა“ თუ კონფერენციის (თბილისი, ნალჩიკი, დონის როსტოვი, ბაქო…) მონაწილე.