“კავკასიურმა სახლმა” ახალი გამგეობა აირჩია

“კულტურულ ურთიერთობათა ცენტრის – კავკასიური სახლის” საერთო კრებამ ახალი გამგეობა აირჩია. გამგეობა დაწესებულების მთავარი მმართველი რგოლი გახლავთ. დასახელებული ორგანო იღებს გადაწყვეტილებებს ორგანიზაციის საფინანსო-საბიუჯეტო და საშტატო პოლიტიკის თაობაზე, საერთო კრებასთან ერთად განკარგავს ცენტრის ქონებას, აყალიბებს სახლის შემადგენელ სტრუქტურულ ერთეულებს და ადგენს მათ ფუნქცია-მოვალეობებს, ირჩევს კავშირის აღმასრულებელ დირექტორს, ამტკიცებს ორგანიზაციის სახელით მომზადებულ განცხადებებს, პროექტებსა და წინადადებებს. 2018 წლიდან ორგანიზაციის მმართველ სტრუქტურაში შვიდი პირი იმუშავებს:

ნაირა გელაშვილი –  ცნობილი ქართველი მწერალი, გერმანისტი და ფილოლოგი, გერმანულენოვანი ლიტერატურის მთარგმნელი, საქართველოს მწვანეთა მოძრაობის ერთ-ერთი დამფუძნებელი. გამგეობამ გელაშვილი ორგანიზაციის თავმჯდომარედ მორიგი ოთხწლიანი ვადით აირჩია.

გიორგი ლობჟანიძე – თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორი, პოეტი, ირანისტი და არაბისტი, ყურანის მთარგმნელი.

თეა გალდავა – ისტორიკოსი, არქეოლოგი, ქართულ-რუსული, ქართულ-აფხაზური და ქართულ-ოსური დიალოგების მონაწილე, თჰე Aუსტრიან შტუდყ ჩენტრე ფორ Pეაცე ანდ ჩონფლიცტ ღესოლუტიონ-ის (შლაინინგი, ავსტრია) კურსდამთავრებული.

მიხეილ გოგებაშვილი – ბიოლოგიურ მეცნიერებათა დოქტორი, რადიოლოგი, თსუ-ის ელეფთერ ანდრონიკაშვილის სახელობის ფიზიკის ინსტიტუტის უფროსი მეცნიერ-თანამშრომელი, „კავკასიური სახლის“ რუსულენოვანი გამოცემის „Кавказский акцент“-ის ყოფილი ჟურნალისტი.

ირაკლი კაკაბაძე – მწერალი, პოეტი, ქართული „პენცენტრის“ ერთ-ერთი დამფუძნებელი, სამოქალაქო აქტივისტი და პერფორმერი, კონფლიქტოლოგი (ჯონ მეისონის უნივერსიტეტი, აშშ), „განდის ფონდი – საქართველოს“ პრეზიდენტი.

ჯაბა კვარაცხელია – იურისტი, დიპლომირებული სამართალმცოდნე, მუშაობს დედაქალაქთან დაკავშირებულ საკითხებზე, გახლდათ „კავკასიური სახლთან“ დაკავშირებული სამართლებრივი დავების მონაწილე.

ლევან ლორთქიფანიძე – მემარცხენე აქტივისტი და პოლიტოლოგი, პოლიტიკური პარტიების მკვლევარი, თსუ-ის სოციალურ და პოლიტიკურ მეცნიერებათა ფაკულტეტის დოქტორანტი, სოციალური სამართლიანობის კვლევის ინსტიტუტის თავმჯდომარე.

ორგანიზაცია ამჟამად კულტურულ-საგანმანათლებლო, მშვიდობის მშენებლობისა და კავკასიის კვლევების მიმართულებით მუშაობს, ეწევა აქტიურ საგამომცემლო საქმიანობას. ცენტრში მოქმედებს მრავალეროვანი საკვირაო სკოლა და სახალხო უნივერსიტეტი. „კავკასიური სახლის“ მთავარი დამფინანსებული ევროპული საოჯახო ფონდი „ჰორიზონი“ გახლავთ.

Comments

comments