ვიდეოკონკურსი

”კავკასიური სახლის” ვიდეოსტუდია აცხადებს კონკურსს ვიდეომასალაზე, რომელშიც ასახული იქნება ეკოლოგიური და სოციალური პრობლემები.კონკურსის მიზანია, ხელი შეუწყოს როგორც სოციალური ჩაგვრისა და უთანასწორობის აღმოფხვრას, ასევე, ჩვენი, უზომოდ დაბინძურებულ-დაზიანებული სასიცოცხლო სივრცის დაცვას.

ვიდეომასალა შეიძლება გადაღებული იყოს სამოყვარულო კამერით, მობილური ტელეფონით და ა.შ.

ვიდეორგოლები განთავსდება ”კავკასიური სახლის” იუთუბ-არხზე.
საუკეთესო მასალის ავტორები დასაჩუქრდებიან.
კონკურსი ღიაა ნებისმიერი მსურველისთვის.

გთხოვთ, გამოაგზავნოთ თქვენი ვიდეომასალა მისამართზე: info@caucasianhouse.ge
გთხოვთ, სათაურის ველში მიუთითოთ ”ვიდეოკონკურსი”, ან მოიტანეთ პროდუქცია ”კავკასიურ სახლში” ორშაბათიდან პარასკევის ჩათვლით., 11 და 17 საათამდე.

მისამართი: გალაკტიონის ქ. N 20, 0105 თბილისი.
”კავკასიური სახლი”, ვიდეოსტუდია.

განაცხადების მიღება რეგიონებში სტრიტ არტის შესაქმნელად დაიწყო

პროექტი “სტრიტ არტი გარემოს დასაცავად” ეძებს მონაწილეებს. თუ ხარ სტრიტ არტით დაინტერესებული ახალგაზრდა და ცხოვრობ საქართველოს რომელიმე ქალაქში (თბილისის გარდა), დაინტერესებული ხარ ამავდროულად გარემოს დაცვის საკითხებით და გსურს ხელი შეუწყო მოსახლეობის ცნობიერების ამაღლებას ამ მიმართულებით, გამოაგზავნე აპლიკაცია 30 აპრილამდე.

პროექტის ფარგლებში შეირჩევა 3 ახალგაზრდა, რომელთაც მიეცემათ შესაძლებლობა საკუთარ ქალაქში განათავსონ ნამუშევარი გარემოს დაცვის თემატიკაზე. აპლიკაცია და პროექტის დეტალები იხილეთ ბმულზე.

მრგვალი მაგიდა ზუგდიდში: კონფლიქტები საქართველოში: ახალი გამოწვევების პოლიტიკური და ეკონომიკური ასპექტები

13 მარტს, 14 საათზე ზუგდიდში, დემოკრატიული ჩართულობის ცენტრის ოფისში, „კავკასიური სახლისა“ და „ნაციონალიზმისა და კონფლიქტების კვლევის ინსტიტუტის“ ორგანიზებით გაიმართება მრგვალი მაგიდა:

„კონფლიქტები საქართველოში: ახალი გამოწვევების პოლიტიკური და ეკონომიკური ასპექტები“

მომხსენებლები:
არჩილ გეგეშიძე – პოლიტიკის ანალიტიკოსი
ვახტანგ ლომჯარია – საქართველოს საზოგადოებრივ საქმეთა ინსტიტუტის (GIPA) ლექტორი
დავით ლოგუა – სახელმწიფო მართვის მაგისტრი

შეხვედრაზე აქცენტი გაკეთდება ქართულ-აფხაზურ და ქართულ-ოსურ კონფლიქტებზე. ასევე გაანალიზდება მსოფლიო სავაჭრო ორგანიზაციაში რუსეთის გაწევრიანების შემდეგ, საქართველოს ტერიტორიაზე გამავალი სავაჭრო დერეფნების პოლიტიკური და ეკონომიკური მნიშვნელობა.

მისამართი: რუსთაველის ქ. 52
დასწრება თავისუფალია!

დისკუსია ტარდება პროექტის “სამხრეთ კავკასიაში მშვიდობის, უსაფრთხოებისა და სტაბილურობის ახალი არქიტექტურის ფორმირება’’ ფარგლებში, რომელიც ხორციელდება დიდი ბრიტანეთის მთავრობის ფინანსური მხარდაჭერით

მრგვალი მაგიდა ბათუმში: კონფლიქტები საქართველოში: ახალი გამოწვევების პოლიტიკური და ეკონომიკური ასპექტები

12 მარტს, 15 საათზე ბათუმის ხელოვნების სასწავლო უნივერსიტეტში „კავკასიური სახლისა“ და „ნაციონალიზმისა და კონფლიქტების კვლევის ინსტიტუტის“ ორგანიზებით გაიმართება მრგვალი მაგიდა:

„კონფლიქტები საქართველოში: ახალი გამოწვევების პოლიტიკური და ეკონომიკური ასპექტები“

მომხსენებლები:
არჩილ გეგეშიძე – პოლიტიკის ანალიტიკოსი
ვახტანგ ლომჯარია – საქართველოს საზოგადოებრივ საქმეთა ინსტიტუტის (GIPA) ლექტორი
გიორგი მასალკინი – ბათუმის შოთა რუსთაველის სახელმწიფო უნივერსიტეტის ფილოსოფიის დეპარტამენტის ასოცირებული პროფესორი
მოდერატორი: გიორგი კანაშვილი – „კავკასიური სახლის“ აღმასრულებელი დირექტორი

შეხვედრაზე აქცენტი გაკეთდება ქართულ-აფხაზურ და ქართულ-ოსურ კონფლიქტებზე. ასევე გაანალიზდება მსოფლიო სავაჭრო ორგანიზაციაში რუსეთის გაწევრიანების შემდეგ, საქართველოს ტერიტორიაზე გამავალი სავაჭრო დერეფნების პოლიტიკური და ეკონომიკური მნიშვნელობა.

მისამართი: ვახტანგ გორგასლის ქუჩა 53
დასწრება თავისუფალია!

დისკუსია ტარდება პროექტის “სამხრეთ კავკასიაში მშვიდობის, უსაფრთხოებისა და სტაბილურობის ახალი არქიტექტურის ფორმირება’’ ფარგლებში, რომელიც ხორციელდება დიდი ბრიტანეთის მთავრობის ფინანსური მხარდაჭერით

პაატა ზაქარეიშვილის საჯარო ლექცია

14 მარტს, 19 საათზე ფაბრიკაში Impact Hub Tbilisi-ში კავკასიური სახლისა და საერთაშორისო არასამთავრობო ორგანიზაცია „International Alert”-ის პროექტის „ახალგაზრდული სამოქალაქო დიალოგის ინიციატივა“ ფარგლებში გაიმართება საჯარო ლექცია „ხელიდან გაშვებული შესაძლებლობები – კონფლიქტები საქართველოში და მოლაპარაკებების ისტორია 1989 წლიდან დღემდე“.

1993 წლის კონფლიქტის დასრულების შემდეგ ქართულ-აფხაზური და ქართულ-ოსური ურთიერთობები დიდი ხნის მაძილზე გაყინული იყო. მდგომარეობა გართულდა 2008 წელს რუსეთის ფედერაციის მხრიდან აფხაზეთისა და სამხრეთ ოსეთის ოკუპაციის შემდგომ. დღეს ჟენევის მოლაპარაკებები ჩიხშია შესული და მხარეებს შორის სტატუს ქვოს შეცვლის პერსპერქტიცა არ ჩანს. კონფლიქტის მოგვარების რა შესაძლებლობები ჰქონდათ მხარეებს საომარი მოქმედებების დასრულების შემდეგ და როგორია სიტუაცია დღეს?

ამ საკითხებზე ლექციას წაიკთხავს საქართველოს ყოფილი სახელმწიფო მინისტრი შერიგებისა და სამოქალაქო თანასწორობის საკითხებში, პაატა ზაქარეიშვილი.

დასწრება თავისუფალია!
მისამართი: ნინოშვილის #8, 0102 თბილისი

საჯარო დისკუსია: სატრანსპორტო დერეფნების მოლოდინში

„კავკასიური სახლის“ ორგანიზებით, 6 მარტს, 19:00 სთ-ზე გაიმართება დისკუსია თემაზე: „სატრანსპორტო დერეფნების მოლოდინში: რას მოგვიტანს 2011 წელს რუსეთსა და საქართველოს შორის ხელმოწერილი შეთანხმების შესრულება? “

აბაშიძე-კარასინის ბოლო შეხვედრაზე, კვლავ გააქტიურდა საქართველოსა და რუსეთს შორის შეთანხმება, რომელიც ორ ქვეყანას შორის ვაჭრობის მონიტორინგს ეხება. თბილისმა და მოსკოვმა შვეიცარიის შუამავლობით 2011 წლის ნოემბერში ხელი მოაწერეს შეთანხმებას, რომელიც ტვირთების გადაადგილებაზე დაკვირვებისა და შემოწმებას ითვალისწინებს.

დარიალის ხეობაში სულ უფრო გახშირებული ბუნებრივი კატასტროფები ხელს უშლის თავისუფალ მიმოსვლას, რაც ყველაზე მეტ პრობლემას სომხეთიდან რუსეთისკენ და პირიქით მიმავალ ტვირთებსა და მგზავრებს უქმნის. ამ პრობლემის გადაწყვეტა შესაძლებელი იქნება ამ ნაკადის როკის გვირაბისკენ მიმართვით. მარტის ბოლოს ამ საკითხთან დაკავშირებით დაგეგმილია ქართული და რუსული მხარეების შეხვედრა შვეიცარიულ კომპანია SGS-თან.
ხელშეკრულების ამოქმედება საინტერესოა ორი მიმართულებით: 1. რა ეკონომიკური შედეგის მომტანი იქნება საქართველოსთვის და 2. როგორი გავლენა ექნება კონფლიქტების მშვიდობიანი ტრანსფორმაციის მიმართულებით.

მომხსენებლები:

სერგი კაპანაძე – პარლამენტის წევრი
გიორგი კანაშვილი – „კავკასიური სახლის“ აღმასრულებელი დირექტორი
ვახტანგ ლომჯარია – საქართველოს საზოგადოებრივ საქმეთა ინსტიტუტის (GIPA) ლექტორი

მოდერატორი:

მაია ურუშაძე, პროექტის მენეჯერი, კავკასიური სახლი

მისამართი: გალაკტიონ ტაბიძის 20, კავკასიური სახლი
დასწრება თავისუფალია!

სალექციო კურსი სამოქალაქო განათლებასა და მშვიდობის მშენებლობაში აცხადებს მიღებას

„კავკასიურმა სახლმა“ დაიწყო განაცხადების მიღება სალექციო კურსში „სამოქალაქო განათლება და მშვიდობის მშენებლობა“ მონაწილეობის მისაღებად

პროექტის შინაარსი
„კავკასიური  სახლი“ საერთაშორისო არასამთავრობო ორგანიზაცია „International Alert“-თან ერთად ახორციელებს პროექტს „ახალგაზრდული სამოქალაქო დიალოგის ინიციატივა“.

პროექტის მიზანია სამხრეთ კავკასიაში მცხოვრებ ახალგაზრდებს საფუძვლიანი ცოდნა მისცეს დემოკრატიის, სამოქალაქო განათლების, ადამიანის უფლებების, კონფლიქტის ანალიზისა და ნაციონალიზმის საკითხებზე. სალექციო კურსი დაყოფილია ორ ნაწილად. ლექცია-სემინარები აკადემიურ და თეორიულ საკითხებზე ჩატარდება კვირაში ორჯერ “კავკასიურ სახლში.” სალექციო კურსის მეორე ნაწილი გულისხმობს საინფორმაციო ხასიათის შეხვედრებს სამთავრობო სტრუქტურების წარმომადგენლებთან და ექსპერტებთან; ასევე თემატური ფილმების ჩვენებასა და დისკუსიებს. პროექტის შედეგად მონაწილეები შეიძენენ ცოდნას და უნარებს, რაც მნიშვნელოვანი იქნება სამომავლოდ პოლიტიკის ფორმირებისა და სამოქალაქო აქტივიზმისთვის.

სალექციო კურსის გავლის შემდეგ მონაწილეთა ნაწილი გაივლის ტრენინგს კონფლიქტების ანალიზის საკითხებში. ტრენინგის შედეგად შერჩეული საუკეთესო კონკურსანტები მონაწილეობას მიიღებენ სამხრეთ კავკასიურ დიალოგში, რომელიც გაიმართება 2017 წლის შემოდგომაზე.

სალექციო კურსი დაიწყება 21 მარტს და გაგრძელდება ორი თვე.

შერჩევის კრიტერიუმები

  • ასაკი: 20-30 წელი
  • სამიზნე ჯგუფი: სტუდენტები, მკვლევრები, რომელთაც სურთ შეიძინონ/გაიღრმავონ ცოდნა სამოქალაქო განათლებისა და კონფლიქტის ანალიზის მიმართულებით
  • სასურველია ინგლისური და რუსული ენების ცოდნა

სააპლიკაციო პროცედურა

დაინტერესებულმა პირებმა გამოაგზავნეთ თქვენი CV და სამოტივაციო წერილი, სადაც არგუმენტირებულად იქნება აღნიშნულ პროექტში თქვენი მონაწილეობის მოტივაცია, შემდეგ ელ-ფოსტაზე: application@caucasianhouse.ge

განაცხადების მიღების ბოლო ვადა:  5 მარტი 

დამატებითი ინფორმაციისთვის დაუკავშირდით რევაზ ქოიავას ელ-ფოსტაზე: revaz.koiava@caucasianhouse.ge; ან ნომერზე: + 995 599 57 01 05

ჩამოტვირთეთ განცხადების ტექსტი.

 

კულტურის კალენდარი 2017 – განცხადებების მიღება დაიწყო

,,კავკასიური სახლის” პროექტი ,,კულტურის კალენდარი” 2004 წლიდან მიმდინარეობს და მის ფარგლებში ყოველწლიურად 30-მდე კულტურული ღონისძიება იმართება „კავკასიური სახლის“ საგამოფენო დარბაზსა თუ ეზოში.

2015 წლიდან ”კავკასიური სახლის” პროგრამის მენეჯმენტის გადაწყვეტილებით, პროექტს ღია კონკურსის სახე მიეცა. კონკურსში მონაწილეობა შეუძლიათ მიიღონ საქართველოში დარეგისტრირებულმა საზოგადოებრივმა ორგანიზაციებმა.

კონკურსის – „კულტურის კალენდარი“ – ფარგლებში დაფინანსდება კულტურის მცირებიუჯეტიანი  (500 ლარის ოდენობით) ინიციატივები, ერთჯერადი ღონისძიებები: გამოფენა, პერფორმანსები, კონცერტი, ლიტერატურული თუ მუსიკალური საღამო და სხვა.

კონკურსის ვადები
,,კავკასიური სახლის” კულტურული პროგრამის ღია კონკურსის მესამე ეტაპი მოიცავს პერიოდს 2017 წლის 15 თებერვიდან 2017 წლის 15 ივნისამდე. შესაბამისად, მცირე კულტურული პროექტებისა და ინიციატივების მოქმედების პერიოდი არ უნდა სცილდებოდეს მოცემულ თარიღებს.

ღია კონკურსის ფარგლებში დაფინანსებული ღონისძიებების ჩასატარებლად, ორგანიზაციებს შეუძლიათ ისარგებლონ ,,კავკასიური სახლის” ინფრასტრუქტურით (ეზო, დარბაზი და სხვ.). იმ შემთხვევაში, თუ დაფინანსებული პროექტის ჩატარება იგეგმება „კავკასიურ სახლში“, გრაფიკი უნდა შეთანხმდეს ღონისძიებების მენეჯერთან.

კონკურსის ფარგლებში არ დაფინანსდება პოლიტიკური პარტიები, პოლიტიკური შინაარსის ღონისძიებები და შესაბამისი ორგანიზაციები.

კონკურსში მონაწილეობის მისაღებად საჭიროა თანდართული განაცხადის შევსება (იხილეთ დანართი).

დამატებითი საბუთები
• კონკურსში მიიღება მხოლოდ საზოგადოებრივი ორგანიზაციების

განაცხადები.

• საპროექტო განაცხადს თან დაურთეთ ამონაწერი საჯარო რეესტრიდან
განაცხადის შემოტანის ბოლო ვადაა 5 თებერვალი
კონკურსის შედეგები ცნობილი გახდება 10 თებერვალს

პროექტის განაცხადი გთოხვთ გადმოაგზავნოთ შემდეგ მისამართზე:

Culture.Calendar.CH@gmail.com

მრგვალი მაგიდა “თანამედროვე მსოფლიო წესრიგის ტრანსფორმაცია

კავკასიური სახლის მოწვევით 20-22 დეკემბერს საქართველოს ლექციების კურსით ეწვია პროფესორი, ისტორიის სოციოლოგი გიორგი დერლუგიანი.

მისი ვიზიტის ფარგლებში 21 დეკემბერს, 13:00 საათზე, ,,კავკასიურ სახლში” გაიმართა დახურული დისკუსია “თანამედროვე მსოფლიო წესრიგის ტრანსფორმაცია” გიორგი დერლუგიანის, ქართველი ექსპერტებისა და პოლიტიკოსების მონაწილეობით. მრგვალ მაგიდაზე განხილული იქნა საერთაშორისო სისტემაში მიმდინარე ცვლილებები, ახალი პარადიგმის ფორმირების პროცესი, რუსეთ-დასავლეთის ურთიერთობა ახალ რეალობაში და კავკასიის რეგიონის როლი ახალ მსოფლიო წესრიგში. დისკუსიის დროს მოხსენებებით წარდგნენ:

გიორგი დერლუგიანი – ისტორიის სოციოლოგი; ნიუ-იორკის უნივერსიტეტის პროფესორი (აბუ-დაბი)
რევაზ ქოიავა – პოლიტოლოგი; „კავკასიური სახლის“ მკვლევარი
ანა დოლიძე – საქართველოს პრეზიდენტის საპარლამენტო მდივანი

„კავკასიური სახლის სახალხო უნივერსიტეტი“ აცხადებს მიღებას

კულტურულ ურთიერთობათა ცენტრი – კავკასიური სახლი აცხადებს მიღებას „კავკასიური სახლის სახალხო უნივერსიტეტის“ ქართულენოვან ჯგუფში.

კავკასია გეოგრაფიული მდებარეობის, ეთნიკურ–ენობრივი მრავალფეროვნების, პოლიტიკური კონფლიქტებისა და სხვადასხვა, გარეაქტორების გეოპოლიტიკური ინტერესების გამო თანამედროვე  მსოფლიოში ერთ-ერთი ყველაზე რთული რეგიონია.  საქართველო რეგიონის ერთადერთი ქვეყანაა, რომელიც ერთდროულად ესაზღვრება, როგორც სამხრეთ ნაწილის ორივე რესპუბლიკას, ასევე ჩრდილოეთ ნაწილის თითქმის ყველა პოლიტიკურ სუბიექტს. ისტორიის სხვადასხვა მონაკვეთში, საქართველო, მეტნაკლები წარმატებით ახერხებდა, რეგიონის მასშტაბით უნიკალური მდებარეობის გამოყენებას.

”კულტურულ ურთიერთობათა ცენტრი – კავკასიური სახლი”  დიდი ხანია მუშაობს კავკასიელი ხალხების ინტეგრაციისა და კავკასიის რეგიონული  განვითარების ხელშემწყობ პროექტებზე. მიგვაჩნია, რომ საქართველოს კავკასიური პოლიტიკა, უპირველეს ყოვლისა უნდა გულისხმობდეს ჰუმანიტარულ, კულტურულ-საგანმანათლებლო ასპექტებს.

სწორედ არსებული პოლიტიკისა და ორგანიზაციის გამოცდილებიდან გამომდინარე, ”კავკასიური სახლი”, 2008 წლიდან ”ევროპული ფონდი ”Horizon” – ის მხარდაჭერით ახორციელებს პროექტს  ”კავკასიოლოგიური სახალხო უნივერსიტეტი”.

პროექტის მიზანია:

მისცეს საფუძვლიანი ცოდნა როგორც  ქართველ, ისე საქართველოში მცხოვრებ სხვადასხვა ეროვნების ახალგაზრდებს კავკასიაში მიმდინარე სოციალურ და პოლიტიკურ მოვლენათა შესახებ; ასევე კავკასიელი ხალხების  ისტორიის, კულტურული მემკვიდრეობისა და ფასეულობების შესახებ.

პროექტის ფარგლებში ლექცია – სემინარები ჩატარდება თვეში სამჯერ.

გარდა წინასწარ დაგეგმილი ლექციებისა, პროექტის ფარგლებში ჩატარდება ე. წ. „საუბრები აქტუალურზე“, სადაც მსმენელები თვითონ იქნებიან მომხსენებლები და მოდერატორები.

დაინტერესების შემთხვევაში მათ აგრეთვე მიეცემათ საშუალება კავკასიური სახლის ვიდეოსტუდიის ტექნიკის გამოყენებით  გადაიღონ დუკუმენტური ფილმები კავკასიურ თემატიკაზე.

პროექტის მსმენელებს სურვილის შემთხვევაში მათ საშუალება ექნებათ დაესწრონ კავკასიურ სახლში გამართულ სხვა კულტურულ ღონისძიებებს – მუსიკალურ და ლიტერატურულ საღამოებს, გამოფენებს, პერფომანსებს და ა. შ.

სასწავლო წლის ბოლოს პროექტის მსმენელთა მონაწილეობით გაიმართება სამეცნიერო კონფერენცია, სადაც ახალგაზრდები წაიკითხავენ მოხსენებებს მათთვის საურველ თემებზე.

მონაწილეთა შერჩევის კრიტერიუმები 

  • ასაკი: 18-35 წელი
  • განათლება: საშუალო, უმაღლესი 
  • ენები:  აუცილებელია ქართული ენის ცოდნა
  • ინტერესი კავკასიური პრობლემატიკისადმი და მიღებული ცოდნის საკუთარი პროფესიულ საქმიანობაში გამოყენების სურვილი

პროექტში მონაწილეობის მისაღებად საჭიროა:

  • შეავსოთ ანკეტა და გადმოგზავნოთ  შემდეგ ელექტრონულ მისამართზე:
  • tujuxu@gmail.com,  beroshvili@hotmail.com
  • CV
  • ფოტო (3×4)

სახალხო უნივერსიტეტში მიღება მოხდება ანკეტისა და გასაუბრების საფუძველზე.

სწავლა უფასოა.

სწავლის ხანგრძლივობა – 1 წელი

ლექციები ჩატარდება  კავკასიურ სახლში. მისამართზე: თბილისი, გალაკტიონ ტაბიძის ქ.20

განცხადებები მიიღება 1 იანვრიდან 15 თებერვლის ჩათვლით. 

დამატებითი ინფორმაციისათვის მიმართეთ პროექტის კოორდინატორს თამარ უჯუხუს

ელფოსტა: tujuxu@gmail.com; ან beroshvili@hotmail.com,

მობ: 577202103/04

ჩვენი პროექტით დაინტერესებულ ახალგაზრდებს ქუთაისში, გორში, ზუგდიდში, თელავში შეუძლიათ შეავსონ შესაბამისი განაცხადი და გამოაგზავნონ მითითებულ იმეილზე გთხოვთ, მიუთითოთ რეგიონი.